KALIBO

ORDINANSANG NAGABAWAE SA TANAN NGA DRUGS OUTLET NGA MAG TA-O IT ANTI-TB DRUG NGA UWA IT PRESKRIPTION, GIN-ISTORYAHAN SA COMMITTEE MEETING!

By: Doniel Aguirre

Nagpa-abot it kalipay si Hon. Nilda Tambong sa mga miyembro it Kalibo Pharmaceuticals Association tungod nga nagatuman gid sanda sa laye nga gina-implementr it gobyerno angot sa pagbawae sa pagtao it mga bueong sa mga tawo nga nagabakae it over the counter nga mga drugs nga uwa it nagakaigo nga preskripsyon halin sa mga doctor. Sa ginpatigayon nga committee hearing on health and rules, laws and ordinances sa sangguniang bayan, gin-istoryahan rong draft ordinance ni Hon. Tambong nga ro ordinance requiring all drug outlets to strictly implemented the “No prescription, No dispensing of Anti-Tuberculosis Drugs” sa tanan nga mga drug outlets sa banwa.

Ginpabutyag ku representante it Pharmaceutical Association nga pabor ag ginasuportahan gid nanda rondayang kasuguan tungod nga pwede man sanda makabaligya it iba pang mga bueong mag-eowas sa Anti-Tb drugs. Nagpa-abot man it pagpasaeamat si Atty. Iledan, tag-iya it sang ka botika iya sa Kalibo, tungod nga sarang nga hipabaskog pa rong implementasyon it laye nga foods, drugs and cosmetics act nga nagamando nga indi pwedeng makabaligya sa tawo kun uwa it nagakaigo nga prescription. Sa rondayang kabangdanan, mataw-an gid it ligwa nga maipatupad rong pag-establisar it mga tuberculosis directly observe treatment system (TB-DOTS) iya sa banwa it Kalibo.

Ro planong ordinansa ni Tambong hay para kunta nga pungan ro mga pasyente nga mag bakae it mga Anti-Tb drugs sa mga botika para bue-ngon to TB bangud nga indi man ra nanada maipatuman hasta gid nga magmayad tungod man sa kamahaeun it rayang bueong. Rong pag-pondo sa pag-inom it bu-eong sa TB hay nagaresulta ku paglala it masakit bangud nga nangin drug resistant eun ro TB nga mabudlay eon boe-ngon it ordinaryong bu-eong. Samtang, rong mga bueong sa TB hay abo sa Rural Health Unit it Kalibo ag libre pa sa pagbulig man it USAID ag Tuberculosis Society Incorporated nga responsible sa pagtukod it TB DOTS sa bilog nga Pilipinas. Sa rondayang kabangdanan, ginpanawagan gid nanday Hon. Tambong, Dr. Melanie Tolentino ag Kalibo Pharmaceutical Association nga likawan rong self medication ag pondohon ro pagbakae it anti TB drugs nga uwa it nagakaigo nga prescription.

Rong draft ordinance ni Hon. Tambong hay paga-rebisahon eon lang ag paga-islan it resolusyon nga naga- suporta sa nasyonal nga laye it nasyon may kaangtanan sa pag-dispense it mga bueong./TE