KALIBO, Aklan, - Ro mga ginikanan nga nagausoy it baeakean it baratong mga gamit sa eskuylahan hay makasalig eon man it uman sa bulig it Department of Trade and Industry (DTI) paagi sa “Balik-Eskwela Diskwento” nga pagadaehon sa Aklan sa pagbukas it klase.
Ro “Balik-Eskwela Diskwento” nga proyekto, suno kay DTI-Aklan Provincial Director Diosdado P. Cadena, Jr. hay pagahiwaton makaron nga dag-on sa Provincial Trade Hall, Capitol Grounds sa Mayo 25-hasta 28 sa pag koordinar sa Gobyerno Probinsyal it Aklan, Department of Educatioon ag mga nagabaligya it mga gaeamiton sa eskuylahan.
Magahalin man mismo rayang mga magabaligya sa Kalibo. Magabaligya sanda it mga gamit nga mas barato ukon may diskwento sa publiko sa ikaywang kahigayunan.
Nag-umpisa ro DTI nga maghiwat it rayang proyekto ku nagtaliwan nga dag-on sa tuyo nga taw-an it tsansa ro mga ginikanan, mga maestro ag maestra ag mga estudyante nga makabakae it mga notebook, pad paper, krayola, ballpen, lapis, bag ag mga uniporme nga mas barato kon ikumparar sa ginabaligya sa ibang baeakean.
Euwas sa barato nga gamit sa eskuylahan, ro lugar hay mangin konbenyente man sa manugbakae tungod raya hay maligwa ag mahangin.
Kaeabanan sa mga eskuylahan sa Aklan hay gintaeana ro pagbukas it klase sa Hunyo 6.(PIA)/TE
No comments:
Post a Comment