Istriktong implementasyon it Municipal Ordinance No. 2009-004 Nag umpisa-eon

By: Doniel Aguirre

Gintaeana eon ro istriktong implementasyon it Municipal Ordinance no. 2009-004. Raya rong ordinansa nga nagamando ku maayos nga pagtatap it mga basura ag para man maipadayon nga malimpyo ro banwa it Kalibo. Pin-agi sa Municipal Solid Waste Management Service Office, pagatutukan ku munisipyo ro probinsya it rondayang ordinansa nga Anti-Illegal Dumping ag Littering. Rayang daywa ka probisyon hay may katimbang nga penalidad sa sin-o man nga madakpan nga magbayolar.

Ro pagpilak it upos it sigarilyo, putos it kendi, chewing gum, uwa it sueod nga plastic bag, ag iba pang maintok nga kalat hay may multa umpisa it P200.00 hasta P500.00. ro sin-o man nga madakpan hay pagataw-an it Environmental Citation Ticket ag sa sueod it tatlong adlaw sarang ra nanda nga bayaran sa opisina ku Municipal Treasurer’s Office pero kun uwa it pambayad, pwedeng mag-community service ro nagbayolar. Sa kada pagpilak ku upos it sigarilyo, putos it kendi ag chewing gum hay pwede ro sangka indibidwal nga mag ta-o it community service sa sueod it 4 nga oras o tunga sa adlaw kun sa siin ro opisina it Solid Waste Management Services Office ro magadesigner kun siin ra sanda mag pang-limpyo. Samtang ro nagpilak it mga uwa it sueod nga plastic bag hay pwedeng mag-community service sa sueod it 8 oras o sang adlaw ag ro nadakpan nga nagpilak it maintok nga kalhit hay pwedeng mag-community service it 10 oras.

Sa probisyon nga Anti-Illegal Dumping gamit ro tricycle kun inindividual, ro penalty hay P1,500.00 o kun 30 oras nga community service ag kun juridical o establishment sakay it tricycle hay maga multa it P2,000.00 o kun may 40 oras nga community service. Ro pag pilak it basura gamit ro ibnag saeakyan kun sa individual hay P2,500.00 o kun 50 oras nga community service. Ginapahanumdom it LGU Kalibo nga ro sin-o man nga owa it intension nga magbayad sa sueod it 3 adlaw o kun mag-community service hay maga baton it summon hasta it 15 days ag kun indi mag-report hay iga summon sa ikaywang tiyempo nga magiging balibado sa sueod it 15 days pero kun indi pagid mag report hay paga-isyuhan it final summon sa sueod it 1month. Pero kun ro mga summons hay ginbaliwala, rong kaso hay igapasaka sa nagakaigo nga korte. Dugang kara ro impormasyon ku bayolasyon hay iga-forward sa NBI. Rong violator kun sa siin do anang kaso hay ginpamatian sa korte pagkatapos nga napamatud-an hay magabayad it P2,000.00 o kun may pag ka-preso nga indi magnaba sa 6 months o may pareho nga magabayad it multa daea man ro pagka-preso depende sa desisyon it korte./TE